طبعا في فرق كبير بين طالب مستواه عادي , وطالب مستواه مش عادي , تعالو نشوف الفرق بينهم.
العادي : بنحضر محاضرة واحدة كل ( يوم أو كل يومين أو كل أسبوع)
السوبر :-b: بيحضر كل محاضرة كل ( يوم وكل يومين وطول الأسبوع)
.................................................. .
العادي: ممكن يعد في البنج الخامس أو السادس أوالسابع أو .................
السوبر:-b : الواحد منهم لو مأعدش في البنج الأول , أو – لقدر الله – التاني , ممكن يجيلو سكتة قلبية , وحالته النفساوية تتدهور, ومش بعيد يخرج بعد المحاضرة يبعت مشكلته لمحمود سعد في البيت بيتك, يطالبه بضرورة تدخل السيد المسؤول وزير التعليم العالي عشان يصدر أوامره للدكتور عشان يعيد المحاضرة
وفيه منهم بيقولو : أنهم مبحبوش يشوفو راس حد في المحاضرة الا راس الدكتور .
...............................................
العادي : ممكن يجيب معاه بالكتير كراسه 24 ورقة , مقطوع منها 6 ورقات , وقلم جاف يا اما خلصان , يا اما طافح
السوبر :-b: أولا لازم يكون معاهم شنطة , فيها ايييييييييييييه ؟
فيها كشكول محاضرات مش أقل من 200 صفحة (لو 199 يرميه ويجيب غيره )
أقلام جاف بجميع الالوان والاشكال (من أول القلم الي بيتكتك , والقلم الفرنساوي أبو نص جنيه , لغاية القلم الي مركبين فيه لمبه وبينور في الضلمة)
أقلام سنون(5ملم عشان الكتابة , و7ملم عشان الرسومات)
ورق فلوسكاب ودباسة عشان لو فيه كويز (الاحتياط واجب برضه)
وكمان الشنطة فيها (كتاب المادة , ملخصات في المادة , مسائل في المادة , حبشتكنات في المادة)
.................................................. .
العادي : لو غاب محاضرة.........................عاااااااااااااااادي
السوبر :-b: لو صحي في يوم ولاقي معاد المحاضرة فات , هيمسك المنبه ويكسره 100 حته , ويطلع علي الصالة ويقول بأعلي صوته : وااااااااه مصيبتاه ........ واااااااااااه أسفاه .......... وااااااااا لهواه , ولما أمه تصحي مفزوعة علي صوتة , تجري عليه وتقوله ( مالك يا ضنايا حد من اخواتك جراله حاجه؟ ) , يرد عليها : المصيبة أكبر , لقد ضاعت المحاضرة يا أماه , وطبعا الرد الطبيعي من أمه , انها تسكعه قلم علي وشه
..........................................
العادي : لو فيه امتحان , ممكن نذاكر
السوبر :-b: لو فيه امتحان , يتحول البيت لثكنة عسكرية , يمنع فيها أي شخص من الاقتراب أو مجاوزة الأسلاك الشائكة التي تحيط بالغرفة والتي يحدث بداخلها حرب ضارية بين الطالب وجميع ما يخص المادة , ولو حاول أي متطفل من اخوته الدخول لغرفته , يتم أخذه أسيرا حتي يدفع والداه الفدية , والا يتم تعليقه في سقف الصالة ليكون عبرة لكل من تسول له نفسه للدخول عليه وهو بيذاكر
.............................................
العادي : طول المحاضرة , يا اما أعدين مبلمين , يا اما كل واحد بيتكلم مع زميله
السوبر :-b: قبل ما الدكتور يدخل , يفتح الكشكول ويمسك القلم ويستعد لدخول الدكتور في أي لحظة (فممكن الدكتور يدخل ويتكلم ويكون الواحد لسه مفتحش الكشكول , ومن هنا تأتي الكارثة بضياع بعض الكلمات الي قالها الدكتور), وما أن يدخل الدكتور حتي تبدأ المعركة التي يراق فيها مئات الأمتار من الحبر علي كشكول المحاضرات الذي طالما اشتكى من ضربات القلم علي صفحاته
............................................
العادي : لما يخلص المحاضرة ممكن يعد شوية في الكلية .
السوبر:-b : أول ما الدكتور يخلص محاضرة , يرمي العدة في الشنطة , وجري علي الميكروباص , وفي خلال فيمتوثانيات معدودة تلاقيه في البيت .
